Ceyhun Bayramov Serbiya səfiri ilə görüşüb

Ezonn TV «APA» mənbəsinə istinadən xəbər verir. 10 noyabr tarixində Azərbaycan Respublikasının xarici işlər naziri Ceyhun Bayramov, Serbiyanın ölkəmizdəki fövqəladə və səlahiyyətli səfiri Draqan Vladisavlyeviçi qəbul edib. Görüş zamanı, ilk öncə, səfirə Azərbaycan Respublikasının Prezidenti tərəfindən "Dostluq" ordeni təqdim olunub. Səfir bu ali mükafatla təltif olunmağına görə dərin minnətdarlığını bildirib və bunu ölkələr arasındakı əlaqələrə verilən yüksək qiymət kimi dəyərləndirib. Görüşdə Azərbaycan-Serbiya münasibətlərinin strateji tərəfdaşlıq xarakteri və mövcud əməkdaşlıq gündəliyi müzakirə edilib. Nazir Ceyhun Bayramov, iki ölkə arasında dostluq və qarşılıqlı hörmətə əsaslanan münasibətlərin yüksək səviyyəsindən məmnunluq ifadə edərək, siyasi dialoqun, qarşılıqlı səfərlərin və yüksək səviyyəli təmasların ikitərəfli əlaqələrin inkişafında mühüm rolunu vurğulayıb. Həmçinin, beynəlxalq hüququn norma və prinsiplərinə, xüsusilə dövlətlərin suverenliyi və ərazi bütövlüyü məsələsində qarşılıqlı dəstəyin əhəmiyyəti qeyd olunub. Görüşdə son illərdə iqtisadi-ticarət əlaqələrinin genişləndirilməsi, qarşılıqlı investisiyaların təşviqi, enerji, nəqliyyat və logistika, sənaye, kənd təsərrüfatı, turizm, humanitar və digər sahələrdə əməkdaşlığın inkişafı müzakirə edilib. Regional və beynəlxalq təşkilatlar çərçivəsində əməkdaşlıq, maraq doğuran məsələlərin uzlaşdırılması və qarşılıqlı dəstəyin davam etdirilməsi mövzuları da gündəmə gəlib. Görüş zamanı, Azərbaycanda diplomatik fəaliyyəti başa çatan səfirə gələcək işlərində uğurlar arzulanıb. Səfir Draqan Vladisavlyeviç, Azərbaycanda fəaliyyəti müddətində göstərilən dəstəyə görə təşəkkür edərək, ölkəmizdəki diplomatik fəaliyyətini məmnunluqla xatırlayıb və Azərbaycan-Serbiya dostluq münasibətlərinin inkişafına inandığını ifadə edib.