Ceyhun Bayramov Serbiya səfiri ilə görüşdü

Ezonn TV «Axar.az» mənbəsinə istinadən xəbər verir. 10 noyabr tarixində Azərbaycan Respublikasının xarici işlər naziri Ceyhun Bayramov, Serbiyanın ölkəmizdəki fövqəladə və səlahiyyətli səfiri Draqan Vladisavlyeviçi qəbul edib. Görüş zamanı, öncə Azerbaijan Respublikasının Prezidenti tərəfindən "Dostluq" ordeni ilə təltif olunan səfirə orden təqdim edilib və təbrik mesajı çatdırılıb. Səfir bu mükafata görə dərin minnətdarlığını bildirərək, bunu ölkələrimiz arasında əlaqələrə verilən yüksək qiymət kimi dəyərləndirib. Görüşdə, Azərbaycan-Serbiya münasibətlərinin strateji tərəfdaşlıq xarakteri, mövcud əməkdaşlıq gündəliyi müzakirə olunub. Ceyhun Bayramov, iki ölkə arasında dostluq münasibətlərinin yüksək səviyyəsindən məmnunluq ifadə edərək, siyasi dialoqun, qarşılıqlı səfərlərin və yüksək səviyyəli təmasların ikitərəfli əlaqələrin inkişafında mühüm rolunu vurğulayıb. Həmçinin, beynəlxalq hüququn norma və prinsiplərinə, dövlətlərin suverenliyi və ərazi bütövlüyünə qarşılıqlı dəstəyin əhəmiyyəti diqqətə çatdırılıb. Görüşdə iqtisadi-ticarət əlaqələrinin genişləndirilməsi, qarşılıqlı investisiyaların təşviqi, enerji, nəqliyyat, logistika, kənd təsərrüfatı, turizm və humanitar sahələrdə əməkdaşlığın inkişafı müzakirə edilib. Regional və beynəlxalq təşkilatlar çərçivəsində əməkdaşlıq məsələləri də gündəmə gətirilib. Sonda, ölkəmizdəki diplomatik fəaliyyəti başa çatan səfirə gələcək işlərində uğurlar arzulanıb. Səfir Draqan Vladisavlyeviç, Azərbaycandakı fəaliyyəti müddətində göstərilən dəstəyə görə təşəkkürünü bildirib və Azərbaycan-Serbiya dostluq münasibətlərinin inkişaf edəcəyinə inandığını dilə gətirib.