Anıtqəbirdə izdiham: Atatürk vəfatının 88-ci ildönümündə yad edilir

Ezonn TV «Yeniçağ» mənbəsinə istinadən xəbər verir. Noyabrın 10-da, Türkiyə Cümhuriyyətinin qurucusu Mustafa Kamal Atatürkün vəfatının 88-ci ildönümü münasibətilə Ankaradakı Anıtqəbirdə çoxsaylı insan toplaşıb. Rəsmi mərasimlər başa çatdıqdan sonra ziyarətçilərə məqbərənin ziyarəti üçün açıq qaldığı bildirilib. Soyuq və qarlı havaya baxmayaraq, vətəndaşlar Anıtqəbiri ziyarət edərək, əllərində Türkiyə bayraqları, Atatürkün portretləri və gül dəstələri ilə onun məzarına ehtiram göstəriblər. Ziyarətçilər məqbərənin qarşısında dua edib, Atatürk üçün bir dəqiqəlik sükut saxlayıblar. Məqbərəni ziyarət edənlər həmçinin Qurtuluş Savaşı Muzeyinə daxil olmaq istəyərkən uzun növbələr yaradıblar. Ziyarət zamanı Anıtqəbirdəki səsgücləndiricilər vasitəsilə Atatürkün məşhur “10-cu il nitqi”nin audioyazısı səsləndirilib. Ziyarətçilər arasında İstanbuldan gəlmiş 18 yaşlı Egemen Akyüz, Anıtqəbiri ziyarət etməyi vətən borcu kimi gördüyünü ifadə edib. 19 yaşlı Kadir Erdoğdu isə Atatürkün məzarını gördükdə duyğulandığını və bu hisslərini ifadə etməyi çətin saydığını qeyd edib. Həmçinin, Avstraliyadan gələn Saras Selva da qrup şəklində ziyarət etdiklərini bildirərək, Atatürkün dünya miqyasında tanınan bir lider olduğunu vurğulayıb.