“QHT-lərin sosial media bacarıqlarının artırılması” layihəsi yekunlaşıb

Ezonn TV «Cebheinfo.az» mənbəsinə istinadən xəbər verir. “İnformasiya və Sosial Təşəbbüslərə Dəstək” İctimai Birliyi, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “QHT-lərin sosial media bacarıqlarının artırılması” layihəsini başa çatdırıb. Layihənin icrası 2023-cü ilin iyun ayından oktyabr ayına qədər davam edib. Layihənin məqsədi, QHT nümayəndələrinin sosial media sahəsində bilik və bacarıqlarını artırmaq, onların fəaliyyətini ictimaiyyətə daha effektiv çatdırmaq və rəqəmsal kommunikasiya imkanlarından səmərəli istifadəyə təşviq etmək olub. Bu çərçivədə Bakı və Sumqayıt şəhərlərində birgünlük praktiki təlimlər təşkil edilib. Təlimlərdə iştirak edən 43 nəfər QHT rəhbəri, əməkdaşları və ictimai fəallar, sosial media strategiyasının hazırlanması, keyfiyyətli mətn, vizual və video məzmunun yaradılması, paylaşım planlaşdırılması və auditoriya ilə effektiv ünsiyyət mövzularını öyrəniblər. Təlimlərdə müasir rəqəmsal alətlər və süni intellekt imkanları haqqında nəzəri və praktiki biliklər təqdim olunub. Digər mühüm istiqamət olaraq, layihə çərçivəsində 15 QHT sədrinin uğur hekayələrini təqdim edən videoçarxlar hazırlanıb. Bu materiallarla QHT-lərin fəaliyyətinin geniş auditoriyaya çatdırılması ve cəmiyyətə verdikləri töhfələr vurğulanıb. Cəsarət Hüseynzadə, layihənin QHT-lərin kommunikasiya bacarıqlarını inkişaf etdirmək və fəaliyyətlərinin görünürlüğünü artırmaq məqsədini güddüyünü bildirib. O, təlimlərin və uğur hekayələrinin QHT-lərin sosial mediadan daha məqsədyönlü istifadəsinə kömək edəcəyinə inanır. Layihənin maliyyə dəstəyinə görə isə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə təşəkkür edilib.