“Xankəndi” futbol klubu doğma şəhərinə köçməyi planlaşdırır

Ezonn TV «Cebheinfo.az» mənbəsinə istinadən xəbər verir. “Xankəndi” futbol klubu, maddi-texniki bazasını və müvafiq infrastrukturunu yaratdıqdan sonra doğma şəhəri Xankəndiyə köçməyi planlaşdırır. Klub rəhbərliyinin verdiyi məlumata görə, şəhər nümayəndəliyi ilə əlaqələrin qurulması və komandanın yerləşməsi üçün bina müəyyənləşdirilməsi istiqamətində işlər aparılır. İlkin plana əsasən, zəruri təşkilati və infrastruktur məsələlərinin həllindən sonra, qış mövsümündən sonrakı dövrdə komandanın Xankəndiyə köçürülməsi nəzərdə tutulur. Bu, klubun Xankəndidəki fəaliyyətini artırmaq və yerli fanatlarla daha sıx əlaqə qurmaq məqsədini güdür. Köçürülmənin dəqiq tarixi isə müvafiq şəraitin yaradılmasından asılıdır. Hazırda Xankəndidə komandanın daimi yerləşməsi üçün lazım olan infrastruktur tam formalaşmadığı üçün futbolçular və məşqçilər heyəti fəaliyyətlərini Bakıda davam etdirirlər. Bu tədbirlər, “Xankəndi” futbol klubunun yerli idman mühitində daha da güclənməsinə və yerli icma ilə inteqrasiyasının artmasına xidmət edir.