Şəhid ailələrinə və müharibə əlillərinə yeni təklif: Mənzil əvəzinə pul kompensasiyası

Ezonn TV «Cebheinfo.az» mənbəsinə istinadən xəbər verir. Milli Məclisin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Regional məsələlər komitələrinin birgə iclasında deputat Qüdrət Həsənquliyev tərəfindən müharibə iştirakçıları və şəhid ailələri üçün yeni bir təklif irəli sürülüb. Həsənquliyev, bu kateqoriyadan olan şəxslərə mənzil əvəzinə pul kompensasiyasının verilməsini düzgün bir yanaşma kimi qiymətləndirib. Deputat, bu sistemin tətbiqi ilə vətəndaşların öz istəklərinə uyğun olan ərazilərdə ev ala biləcəklərini, eyni zamanda torpaq sahəsi əldə edərək ev tikmək imkanına sahib olacaqlarını bildirib. O, hökumətin bu məsələyə ciddi yanaşmasını tələb edib: "Onlar istədiyi yerdən, bəlkə də valideynlərinə yaxın bir yerdən almaq istəyirlər" – deyə Həsənquliyev vurğulayıb. Deputat, şəhid ailələri və müharibə əlillərinin mənzil təminatı ilə bağlı bir sıra sualları gündəmə gətirib. O, hazırda mənzil növbəsində olan şəhid ailələrinin və müharibə əlillərinin sayı, son altı ildə kimlərin mənzillə təmin edildiyi, 2027-ci ildə ayrılan vəsait hesabına tikiləcək mənzillərin sayı və növbədə qalanların sayı ilə bağlı məlumatların açıqlanmasını tələb edib. Həsənquliyev, 20 Yanvar hadisələri ilə əlaqədar zərər çəkmiş ailələr arasında indiyə qədər mənzillə təmin olunmayan şəxslərin olduğunu da qeyd edib. O, həmin şəxslərin mənzil təminatı ilə bağlı şəkillərin aydınlaşdırılmasını xahiş edib.