Putin üçün uzunömürlülük axtarışı: 7000-dən çox meymun...

Ezonn TV «Axar.az» mənbəsinə istinadən xəbər verir. Rusiya Prezidenti Vladimir Putinin yaxın dostu Mixail Kovalçukun rəhbərlik etdiyi Kurçatov İnstitutunda insan ömrünün uzadılması məqsədilə 7000-dən çox meymun saxlanan unikal bir kolleksiya yaradılıb. Alimlər bu meymunlar üzərində tədqiqatlar aparmaqla yaşlanma proseslərini öyrənməyi planlaşdırırlar. Kovalçuk, Moskvada keçirilən Kurçatov Genom Forumunda meymunlarla bağlı tədqiqatları açıqlayaraq, 22 növdən olan bu primatların yaşlanma mərhələlərinin izlənməsi üçün yaşlı meymunların dərin analizlərinin aparıldığını bildirib. Aydındır ki, 18 və 30 yaşdan yuxarı meymunlar üzərində biokimyəvi və struktur analizlərin həyata keçirilməsi planlaşdırılır. Kurçatov İnstitutunun Rusiya Elmi Cərrahiyyə Mərkəzi ilə birgə uzunömürlü meymunların qan nümunələrini əhatə edən biobank yaratdığı da bildirilir. Mərkəzin direktoru Konstantin Kotenko, bu nümunələrin yaşlanma proseslərinin öyrənilməsi məqsədilə istifadə olunacağını vurğulayıb. Qeyd edək ki, Rusiya hökuməti, yaşlanma ilə mübarizə məqsədilə bioprint, ksenotransplantasiya və gen terapiyasını əhatə edən 26 milyard dollarlıq bir proqramı maliyyələşdirir. Proqramın rəhbərliyini Putinin qızı Mariya Vorontsova ilə Kurçatov İnstitutunun rəhbəri Mixail Kovalçuk həyata keçirir.