Yol polisinin adından saxta cərimə mesajları göndərilir - Xəbərdarlıq

Ezonn TV «Bizim.Media» mənbəsinə istinadən xəbər verir. Son günlər Milli Kibertəhlükəsizlik Agentliyi (MKA) tərəfindən Dövlət Yol Polisinin adından vətəndaşlara göndərilən saxta cərimə mesajlarının artdığı təsdiqlənib. Agentlik, kiberdələduzların xarici nömrələr vasitəsilə sürət həddinin aşılması ilə bağlı vətəndaşlara yanlış məlumatlar göndərdiyini açıqlayıb. Mesajlarda istifadəçiləri “ASAN Pay” elektron ödəniş portalının bənzər görünüşlü saxta veb-səhifələrinə yönləndirən keçidlər yerləşdirilib. Bu səhifələrdə əvvəlcə nəqliyyat vasitəsinin dövlət qeydiyyat nişanı tələb olunur. Daha sonra isə, guya törədilmiş yol hərəkəti qayda pozuntusu haqqında yalan məlumatlar təqdim edilir. Vətəndaşlardan cərimənin ödənilməsi üçün bank kartı məlumatlarını, o cümlədən nömrələrini, bitmə tarixini və CVV/CVC kodunu təqdim etmələri istənilir. Bu məlumatların verilməsi, onların bank hesablarındakı vəsaitlərin itirilməsinə səbəb ola bilər. MKA, vətəndaşları bu cür fişinq cəhdlərinə qarşı ehtiyatlı olmağa və aşağıdakı təhlükəsizlik qaydalarına əməl etməyə çağırır. Dövlət qurumları, cərimə və ya ödəniş bildirişlərini xarici nömrələrdən göndərmir. Beləliklə, SMS və messencerlər vasitəsilə göndərilən naməlum keçidlərə daxil olmamaq, domen adının rəsmi mənbəyə aid olduğunu yoxlamaq, şübhəli səhifələrdə bank kartı məlumatlarını daxil etməmək kimi tədbirlər vacibdir. Həmçinin, cərimə və yol hərəkəti qayda pozuntuları barədə məlumatları yalnız rəsmi dövlət resursları və “ASAN Pay” xidmətinin rəsmi kanalları vasitəsilə yoxlamaq tövsiyə edilir. Əgər vətəndaş bank kartı məlumatlarını saxta səhifəyə daxil edibsə, dərhal bank ilə əlaqə saxlayaraq kartı bloklamalıdır və hüquq-mühafizə orqanlarına bildirilməlidir.