Qırmızıbazar kəndində traktor minaya düşüb, bir nəfər xəsarət alıb

Ezonn TV «APA» mənbəsinə istinadən xəbər verir. Xocavənd rayonunun Qırmızıbazar kəndinin ərazisində 11 noyabr tarixində bir mina partlayışı baş verib. Hadisə nəticəsində 1984-cü il təvəllüdlü Bərdə rayon sakini İsmayılov İsgəndər Adil oğlu idarə etdiyi traktorla tank əleyhinə minaya düşərək xəsarət alıb. İsmayılov, hadisədən sonra Füzuli Rayon Mərkəzi Xəstəxanasına aparılıb. Mütəxəssislər onun bədənində bir sıra ciddi travmalar aşkarlayıb. Pasiyentdə sol saidin aşağı 1/3 hissəsinin amputasiyası, sol said sümüklərinin yerdəyişmiş sınığı, sol baldır sümüklərinin yerdəyişmiş sınığı və sol aşağı ətraf oynağının çıxığı diaqnozları müəyyən edilir. Həmçinin bədənin müxtəlif nahiyələrində sıyrılmış yaralar olduğu bildirilib. Xəsarət alan şəxsin vəziyyəti ilə bağlı tibbi müdaxilələr aparılıb və cərrahi əməliyyat edilib. Daxili İşlər Nazirliyi, Baş Prokurorluq və Minatəmizləmə Agentliyinin (ANAMA) məlumatına görə, faktla bağlı Xocavənd rayon prokurorluğunda araşdırma aparılır. Xatırladaq ki, bu hadisə Azərbaycanın işğaldan azad edilmiş bölgələrində mina təhlükəsinin hələ də ciddi bir problem olduğunu bir daha ortaya qoyur.