Teymur Musayev COP31-də baş nazirin müavini kimi ilk çıxışını edib

Ezonn TV «Modern.az» mənbəsinə istinadən xəbər verir. Azərbaycan Respublikası Baş nazirinin müavini Teymur Musayev Türkiyədə təşkil olunan COP31 sessiyasında çıxış edərək, ölkənin 2030-cu ilədək günəş və külək enerjisi istehsal gücünü 6 giqavat artırmağı planlaşdırdığını açıqlayıb. Musayev, Türkiyənin COP31-ə sədrliyini yüksək qiymətləndirdi və qardaş ölkənin dialoq və konsensus yönlü fəaliyyətini xüsusi vurğuladı. Musayev çıxışında, Azərbaycanın COP29-a sədrliyi dövründə inklüziv prosesin irəliləməsi haqqında məlumat verərək, o dövrdə qəbul edilən Bakı Maliyyə Hədəfinin qlobal iqlim fəaliyyətləri üçün əhəmiyyətini qeyd etdi. O, bildirdi ki, Azərbaycanın iqlim gündəliyindəki fəaliyyətləri COP29-dan sonra da davam edib və bu istiqamətdə “Bakıdan Belemə 1,3 trilyonluq Yol Xəritəsi” hazırlanıb. Baş nazirin müavini, 2035-ci ilədək iqlim maliyyələşdirilməsinin illik həcminin 1,3 trilyon ABŞ dollarına çatdırılması məqsədini önə çəkdi. O, həmçinin Braziliya, Birləşmiş Ərəb Əmirlikləri və Avstraliya ilə birgə müxtəlif iqlim proqramlarının həyata keçirildiyini bildirdi. Musayev, Azərbaycanın üçüncü Milli Səviyyədə Müəyyən Edilmiş Töhfələr çərçivəsində istixana qazı emissiyalarının 40 faiz azaldılması hədəfinin 2035-ci ilə irəlilədiyini qeyd etdi. Uzunmüddətli Aşağı Emissiyalı İnkişaf Strategiyası isə 2060-cı ilədək xalis sıfır emissiya səviyyəsinə çatmağı nəzərdə tutur. O, əməkdaşlığa olan sadiqliyi və iqlim siyasətinin əsas istiqaməti kimi enerji keçidini vurğuladı. Teymur Musayev, son dövrlərdə baş verən iqlim fəlakətlərinin insanlara təsirini xatırladaraq, inkişaf etməkdə olan ölkələrin maliyyə resurslarına çıxışının vacibliyini diqqətə çatdırdı. O, qəbul edilmiş qərarların tam həcmdə icrasının önəmli olduğunu vurğuladı və Türkiyə ilə sıx əməkdaşlığa açıq olduğunu bildirdi.