Şəmkirdəki qəzaya səbəb sürücünün içkili olması imiş

Ezonn TV «Cebheinfo.az» mənbəsinə istinadən xəbər verir. Şəmkir rayonunda, Qılıncbəyli kəndində baş vermiş avtomobil qəzasında iki nəfərin ölümü, bir nəfərin isə xəsarət alması ilə nəticələnib. Hadisə zamanı ‘Toyota’ markalı avtomobilin aşması müəyyən edilmişdir. Qarşıdakı döngəni dövr edərkən idarəetməni itirən sürücünün alkoqollu içki qəbul etdiyi bildirilir. Baş Dövlət Yol Polisi İdarəsinin (BDYPİ) verdiyi ilkin məlumata görə, sürücünün nahamar yol örtüyü üzərində sürət həddinə nəzarət edə bilməməsi qəzanın baş verməsinə səbəb olub. Avtomobildə olan üç nəfər dost, kafenin birində yeyib-içdikdən sonra evə qayıdarkən bu hadisə baş vermişdir. Hadisə nəticəsində ölümlə nəticələnən şəxslərin kimliyi təsdiqlənib. Bu, Qılıncbəyli kənd sakinləri, 1995-ci il təvəllüdlü Elgün Abbasov və eyni ildə dünyaya gəlmiş Eşqin Abbasovdur. Onlar sinif yoldaşıdırlar. Yaralanmış şəxsin adı hələlik açıqlanmayıb, lakin o, Şəmkir rayon Mərkəzi Xəstəxanasına aparılıb. Hadisənin təfərrüatları araşdırılır, hadisə yerinə polis əməkdaşları cəlb olunub. Bütün detallarla bağlı məlumatlar dəqiqləşdiriləcək.