Alimlər xəbərdarlıq edirlər: Fırtına, quraqlıq, daşqınlar...

Ezonn TV «Cebheinfo.az» mənbəsinə istinadən xəbər verir. Dünyada iqlim dəyişikliyinin qarşısını almaq üçün görülən tədbirlərin yetərsiz olması qlobal istiləşmə təhlükəsini artırmaqdadır. İqlim Fəaliyyətinin Monitorinqi (CAT) təşkilatının hesabatına əsasən, hökumətlərin istixana qazı emissiyalarını azaltmaq istiqamətindəki gecikmiş addımları nəticəsində, əsrin sonuna qədər planetin orta temperaturunun sənayeləşmədən əvvəlki dövrlə müqayisədə 2,7 dərəcə yüksələcəyi proqnozlaşdırılır. Bu isə milyardlarla insanın ciddi iqlim fəsadları ilə üzləşəcəyini göstərir. Hesabatda bildirilir ki, ötən ilkü proqnozdan (2,6 dərəcə) yüksək olan bu göstərici, ölkələrin on il əvvəl qlobal temperatur artımını 1,5 dərəcə ilə məhdudlaşdırmaq barədə razılığa gəlmələrinin əksinədir. Alimlər, temperaturun yüksəlməsinin fırtına, quraqlıq, isti hava dalğaları və daşqınların təsirini daha da gücləndirə biləcəyinə diqqət çəkirlər. Bəzi bölgələrdə iqlim şəraitinin insanların uyğunlaşa bilməyəcəyi səviyyəyə çatması ehtimalı da var. BMT-nin Antalyada keçirilən iqlim danışıqlarında bu məsələlər müzakirə olunmaqdadır. BMT-nin Baş katibi Antonio Quterreş, hökumətləri fosil yanacaqlardan istifadənin mərhələli dayandırılması üçün təcili tədbirlər görməyə çağırıb. Hesabata görə, bütün ölkələr öhdəliklərini yerinə yetirsələr belə, temperatur artımının 1,9 dərəcə olacağı gözlənilir. Dövlətlərin əvvəlki vədlərinə əməl etməməsi vəziyyəti daha da çətinləşdirir. “Climate Analytics” təşkilatının rəhbəri Bill Hare, hökumətlərin fosil yanacaq sənayesini dəstəkləmək əvəzinə, getdikcə ucuzlaşan təmiz enerji texnologiyalarına keçidi sürətləndirmələrinin vacibliyini vurğulayıb. O, 1,5 dərəcəlik həddin aşılmasının iqlim dəyişikliyi ilə mübarizədən imtina üçün bəhanə olmamalı olduğunu qeyd edib. Bununla yanaşı, hesabatda müsbət tendensiyalar da mövcuddur. Təmiz enerji sahəsinə yatırılan investisiyalar, fosil yanacaqlara yönəldilən sərmayələri iki dəfə üstələyib. Elektrik avtomobillərinin istifadəsi artıb və Amazon meşələrində qırılma əhəmiyyətli dərəcədə azalıb. Hesabatın əsas müəllifi Sarah Hek, hökumətlərin iqlim təhlükəsinin qarşısını almaq üçün lazımi tədbirləri yetərincə sürətli həyata keçirmədiklərini vurğulayıb.