Mikayıl Cabbarov bu şirkətlərin rəhbərlərini qəbul etdi

Ezonn TV «Cebheinfo.az» mənbəsinə istinadən xəbər verir. İqtisadiyyat naziri Mikayıl Cabbarov, Hindistanın “Hinduja Group” şirkətlər qrupuna daxil olan “Gulf Oil International” şirkətinin sədri Sanjay Hinduja və “Ashok Leyland” şirkətinin sədri Dhiraj Hinduja ilə videokonfrans formatında görüş təşkil edib. Görüşdə birgə layihələrin həyata keçirilməsi imkanları müzakirə edilib. Cabbarov, görüş zamanı Azərbaycanın əlverişli biznes və investisiya mühitindən, eləcə də sənaye potensialından bəhs edib. Nazir, nəqliyyat və enerji infrastrukturu ilə yanaşı, regional bazarlara çıxış imkanlarını da vurğulayıb. Tərəflər, birgə layihələrin icrası, texnologiya transferi və nəqliyyat vasitələrinin istehsalının lokallaşdırılması yönündə əməkdaşlıq perspektivlərini müzakirə ediblər. Sənaye, nəqliyyat və enerji sahələrində işbirliyinin genişləndirilməsi məqsədilə müzakirələr aparılıb. “Hinduja Group” 1914-cü ildən fəaliyyət göstərən beynəlxalq şirkətlər qrupudur. Bu qrup 38 ölkədə fəaliyyət göstərir və 100-dən çox ölkədə biznes əməliyyatlarına malikdir. 250 min nəfərdən çox əməkdaşı olan qrup, sürtkü materialları, bank və maliyyə xidmətləri, rəqəmsal texnologiyalar, enerji və daşınmaz əmlak sahələrində fəaliyyət göstərir. “Gulf Oil International” və “Ashok Leyland” bu qrupun əsas şirkətləri arasında yer alır.