DİN və ETSN birgə əməliyyat keçirib

Ezonn TV «APA» mənbəsinə istinadən xəbər verir. Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsi, Ekologiya və Təbii Sərvətlər Nazirliyinin (ETSN) Dövlət Ekoloji Təhlükəsizlik Xidməti ilə birgə meşə massivlərində qanunsuz ağac kəsimi ilə əlaqədar əməliyyat keçirib. Bu əməliyyat nəticəsində bir neçə rayon sakini saxlanılıb. Hüquq mühafizə orqanlarının verdiyi məlumata görə, Baş İdarəyə Şəki rayonunun Kiş kəndində qiymətli ağac növlərinin kütləvi şəkildə qanunsuz kəsilməsi ilə bağlı məlumat daxil olub. Bu məlumat əsasında həyata keçirilən tədbirlər sayəsində, ağacları qanunsuz kəsməkdə şübhəli bilinən Hümmət Feyzullayev, Nüyvər Babayev, Sərxan Hümmətov, Taleh Abdullayev, Rüstəm Məhərrəmov və Qəmlo Nəsirli saxlanılıblar. Araşdırmalar göstərib ki, saxlanılan şəxslər kəsdikləri ağacları emal edərək, satışını həyata keçiriblər. Ərazidə aparılan baxış zamanı 100-dən artıq kəsilmiş fıstıq ağacının kökləri aşkarlanıb. Ekspert rəyinə əsasən, qanunsuz kəsilən ağaclardan bəziləri 100–150 yaşındadır. DİN hazırda qanunsuz ağackəsmə hallarının qarşısının alınması məqsədilə araşdırmaları və nəzarət tədbirlərini davam etdirir. Nazirlik, vətəndaşlara ağacların və digər yaşıllıqların qanunsuz kəsilməsinin yolverilməz olduğunu xatırladaraq, belə hallarla rastlaşdıqda polisə məlumat vermələrini tövsiyə edir.