100 ağac kəsintisinə görə altı nəfər saxlanıldı

Ezonn TV «Xəzər Xəbər» mənbəsinə istinadən xəbər verir. Daxili İşlər Nazirliyi (DİN) və Ekologiya və Təbii Sərvətlər Nazirliyinin birgə əməliyyatı nəticəsində Şəkidə qanunsuz ağac kəsimində şübhəli bilinən altı nəfər saxlanılıb. Bu barədə DİN-in yaydığı məlumatda bildirilir. Məlumatda vurğulanır ki, Şəki rayonunun Kiş kəndi ərazisində qiymətli ağac növlərinin kütləvi şəkildə qanunsuz kəsilməsi ilə bağlı Baş Mütəşəkkil Cinayətkarlıqla Mübarizə İdarəsinə məlumat daxil olub. Araşdırmalar nəticəsində Hümmət Feyzullayev, Nüyvər Babayev, Sərxan Hümmətov, Taleh Abdullayev, Rüstəm Məhərrəmov və Qəmlo Nəsirli adlı şəxslər müəyyən edilərək saxlanılıblar. Araşdırmalar zamanı məlum olub ki, saxlanılan şəxslər ağacları qanunsuz şəkildə kəsdikdən sonra emal edərək satışını həyata keçiriblər. Əraziyə keçirilən baxış zamanı 100-dən artıq kəsilmiş fıstıq ağacının kökləri aşkarlanıb. Ekspertlərin rəyinə görə, kəsilən ağacların yalnız bəzilərinin 100–150 yaşında olduğu müəyyən edilib. Qanunsuz ağackəsmə hallarının qarşısının alınması məqsədilə DİN tərəfindən digər təqsirli şəxslərin müəyyən edilərək məsuliyyətə cəlb olunması üçün araşdırmalar davam etdirilir. Nazirlik, vətəndaşları yaşıllıqları qorumağa və ağacların qanunsuz kəsilməsi ilə bağlı rast gəldikləri hallarda dərhal polisə məlumat verməyə çağırır.