Bakıda keçiriləcək mötəbər sammit üçün qeydiyyat başladı

Ezonn TV «Xəzər Xəbər» mənbəsinə istinadən xəbər verir. 2027-ci ildə Bakıda "SportAccord Convention 2027" idman sammitinin keçirilməsi üçün qeydiyyat prosesi start götürüb. Bu məlumatı Bakı Şəhər Halqası Əməliyyat Şirkəti yayıb. Sammitdə 120-dən artıq beynəlxalq idman federasiyası, Beynəlxalq Olimpiya Komitəsi (BOK), qlobal idman yarışlarına ev sahibliyi edən şəhərlərin rəhbər strukturları və idman sənayesinin aparıcı şirkətləri iştirak edəcək. Ümumilikdə, 65-dən artıq ölkədən 600-dən çox təşkilatın nümayəndəsi, 1700-dən yuxarı rəsmi şəxs tədbirdə yer alacaq. "SportAccord" beynəlxalq idman təşkilatlarının rəhbərlərini, sənaye ekspertlərini və iş dünyasının liderlərini bir araya gətirən müstəsna bir platformadır. Beş gün davam edəcək sammit çərçivəsində beynəlxalq federasiyaların rəsmi iclasları, konfranslar, panel müzakirələri, ixtisaslaşmış sərgilər və B2B görüşləri həyata keçiriləcək. Bu, iştirakçılara strateji tərəfdaşlıqlar qurmaq, qabaqcıl təcrübə mübadiləsi aparmaq və idman sənayesinin gələcək inkişaf vektorlarını müəyyənləşdirmək imkanı verəcək. Tədbirin əsas işgüzar proqramı Bakı Konqres Mərkəzində, təntənəli açılış mərasimi isə Heydər Əliyev Mərkəzində keçiriləcək. "SportAccord Convention 2027" Azərbaycanın qlobal idman xəritəsindəki mövqeyini möhkəmləndirəcək və ölkənin beynəlxalq tədbirlərə ev sahibliyi imkanlarını yenidən nümayiş etdirəcək. Bu sammit eyni zamanda yerli şirkətlərə dünya idman sənayesinin aparıcı simaları ilə birbaşa əlaqələr qurmaq və öz potensialını beynəlxalq auditoriyaya təqdim etmək fürsəti yaradacaq.