Subbakalavrların universitetə üçüncü kursdan başlaması təklif olunur

Ezonn TV «Modern.az» mənbəsinə istinadən xəbər verir. Azərbaycanda orta ixtisas təhsili alan tələbələrə universitetə qəbul prosesi zamanı daha səmərəli yanaşma təklif olunur. Yeni modelə əsasən, kolleci bitirən subbakalavrlar bakalavr təhsilini birinci kursdan deyil, birbaşa üçüncü kursdan davam etdirə biləcəklər. Bu yanaşma onların iki il vaxtına və maliyyə yükünün azalmasına imkan tanıyacaq. Təhsilin keyfiyyətinin artırılması və tələbələrin vaxt itkisini önləmək məqsədilə irəli sürülən daha səmərəli “2+2” modeli, subbakalavrların kollecdəki iki il ərzində topladıqları 120 kreditin universitetin bakalavriat proqramına daxil edilməsi imkanını təqdim edir. Beləliklə, tələbələr üçüncü kursdan başlayaraq, universitetdə yalnız əlavə iki il təhsil alaraq bakalavr diplomu əldə edə biləcəklər. Azərbaycanda subbakalavrların ali təhsil müəssisələrinə qəbulu üçün hüquqi əsaslar da mövcuddur. 2018-ci ildən “Təhsil haqqında” qanuna edilən dəyişikliklər subbakalavrların ali təhsilə qəbulunu mümkün edir. Bununla yanaşı, kreditlərin tanınması ilə bağlı praktiki çətinliklər qalmaqdadır, çünki kolleclərin və universitetlərin proqramlarındakı fərqliliklər bu prosesi çətinləşdirir. Dünyanın bir çox ölkələrində, o cümlədən ABŞ, Böyük Britaniya və Türkiyədə keçid mexanizmləri mövcuddur. Bu yanaşmaların məqsədi tələbələrin əvvəlki bilik və bacarıqlardan yararlanmasını təmin etməkdir. Məqsəd, Azərbaycanda da tələbələrin təhsil müddətini qısaltmaqla yanaşı, təhsil keyfiyyətini artırmaqdır. Təklif olunan modelin tətbiqi tələbələrin iş bazarına daha tez daxil olmasına və ailə büdcəsinə qənaət etməyə imkan verə bilər.