Kriminal şəbəkənin rəhbəri Azərbaycanda tutuldu

Ezonn TV «Qafqazinfo» mənbəsinə istinadən xəbər verir. Azərbaycanda "Boyunlar" kriminal qruplaşmasının rəhbərlərindən biri olan Mehmet Recep Demir, barəsində 48 iş üzrə həbs qərarı olduğu halda, tutulub. Onun tutulması ilə bağlı məlumatlar Türkiyənin media qurumları, o cümlədən Anadolu Agentliyi tərəfindən rəsmi dövlət orqanlarına istinad edilərək yayılıb. İlk olaraq, Demirin Azərbaycana gizli keçdiyi barədə məlumatlar yayılmışdı. Sonra isə onun Azərbaycanda silahlı hücum nəticəsində öldüyü iddiaları ortaya atılmışdı; lakin sonradan bu məlumatların yalan olduğu aşkara çıxıb. Məlumatlara əsasən, bu dezinformasiyanın onun təqiblərdən yayınmaq məqsədilə yayıldığı düşünülür. Dövlət Təhlükəsizliyi Xidmətinin (DTX) həyata keçirdiyi əməliyyat tədbirləri nəticəsində Mehmet Recep Demirin Azərbaycanda gizləndiyi müəyyən edilərək həbs edilib. Onun saxlanıldığı yer DTX-nin təcridxanasıdır. Türkiyə hüquq-mühafizə orqanları "Boyunlar" və ondan ayrı olan "Daltonlar" qruplaşması ilə bağlı genişmiqyaslı istintaq aparır. Həmçinin, Türkiyə Baş Prokurorluğu, Demirin Azərbaycandan ekstradisiya olunması ilə bağlı sorğu hazırlayıb və bu sorğu Azərbaycanın müvafiq orqanlarına təqdim edilib.