Bakıda “Eternity-2026” təliminin açılışı oldu

Ezonn TV «Axar.az» mənbəsinə istinadən xəbər verir. Noyabrın 12-də Bakıda Azərbaycan, Gürcüstan və Türkiyə nümayəndələrinin iştirak etdiyi “Eternity-2026” kompüter dəstəkli komanda-qərargah təliminin açılış mərasimi baş tutub. Təlim, regional təhlükəsizliyin artırılması məqsədini güdür. Müdafiə Nazirliyinin məlumatına görə, təlimin keçirildiyi Milli Müdafiə Universitetinin Hərbi İdarəetmə İnstitutunun Hərb Oyunları Mərkəzində, Azərbaycan Ordusunun hərbi qulluqçuları ilə yanaşı, “Azərbaycan Dəmir Yolları” Qapalı Səhmdar Cəmiyyətinin Mühafizə departamenti və Strateji Obyektlərin Mühafizəsi Dövlət Agentliyinin personalı da iştirak edib. Açılış mərasimində öncə, hər üç ölkənin azadlığı uğrunda canını qurban vermiş şəhidlərin xatirəsi bir dəqiqəlik sükutla yad edilib. Azərbaycan, Gürcüstan və Türkiyənin dövlət himnləri səsləndirilib. General-mayor Vüqar Əliverdiyev çıxış edərək, müdafiə naziri general-polkovnik Zakir Həsənovun salamlarını iştirakçılara çatdırıb və onların qarşısında duran tapşırıqların icrasında uğurlar arzulayıb. Təlimə 200-dən çox iştirakçının cəlb olunduğu bildirilib. Mərasimdə təlimin məqsədi, qarşıya qoyulan tapşırıqlar və aidiyyəti dövlət qurumlarının fəaliyyəti barədə geniş məlumat verilib. Məlum olub ki, bu mütəmadi keçirilən təlim, regional iqtisadi layihələrin və strateji obyektlərin mühafizəsi üzrə birgə fəaliyyətin koordinasiyasını təkmilləşdirməyə yönəlib. Həmçinin, iştirakçıların təbii resursların daşınması zamanı təhlükəsizliyi təmin etməyə dair əməliyyat və analitik bacarıqlarını inkişaf etdirməyi hədəfləyir. Təlim noyabrın 20-dək davam edəcək və qarşılıqlı fəaliyyətin artırılması baxımından mühüm əhəmiyyət kəsb edir.