DYP: Yol qəzalarının 41,1%-i piyadavurma hadisələridir

Ezonn TV «Axar.az» mənbəsinə istinadən xəbər verir. Cari ilin 10 ayı ərzində piyadaların vurulması ilə nəticələnən 384 yol-nəqliyyat hadisəsi qeydə alınıb. Bu barədə Baş Dövlət Yol Polisi İdarəsi (BDYPİ) məlumat təqdim edib. Ümumi yol qəzalarının 41,1%-ini məhz piyadavurma hallarının təşkil etdiyi bildirilib. İdarənin açıqlamasında vurğulanıb ki, noyabrın 12-də Xəzər, Qaradağ və Ağsu rayonları ərazisində bir sutka ərzində baş verən qəzalar nəticəsində 3 piyada dünyasını dəyişib. Bu hadisələr təkcə say baxımından deyil, eyni zamanda insanların həyatlarına təsiri baxımından da dərin faciədir. BDYPİ-nin məlumatında qeyd olunur ki, bu rəqəmlər yalnız statistikada yer tutmur, həm də zərərçəkmişlərin ailələrinə təsir edən ağır bir gerçəklikdir. "Biz qeyd edirik ki, məsuliyyətsiz sürücülük amili ilə yanaşı, piyadalar arasında təhlükəsizlik qaydalarına biganə yanaşma da bu cür faciələrin baş verməsinə səbəb olur. Yolu istənilən yerdən keçmək adəti, təhlükəsizliyi təmin etməyən davranışlar hələ də geniş yayılmışdır," - deyə bildirilib.