Deputat “10 illik maliyyə öhdəliyi pasportu” mexanizminin tətbiqini təklif edib

Ezonn TV «APA» mənbəsinə istinadən xəbər verir. Milli Məclisin deputatı Vüqar İskəndərov, bu gün keçirilən Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında iri dövlət investisiya layihələri üçün “10 illik maliyyə öhdəliyi pasportu” mexanizminin tətbiqini təklif edib. Deputat, yeni mexanizmin hər bir iri layihənin təsdiqlənmədən əvvəl yalnız tikinti dəyərinin deyil, eyni zamanda gələcək istismar xərcləri, təmir ehtiyacları və mümkün qənaət imkanları da daxil olmaqla təqdim olunmasını tələb etdiyini bildirib. Bu yanaşma, layihələrin maliyyələşdirilməsi zamanı daha ağıllı və effektli müstəvidə qərarların verilməsinə imkan tanıyır. İskəndərov, bugünkü investisiya qərarlarının gələcək büdcəyə uzunmüddətli maliyyə öhdəliyi yaratdığını qeyd edərək, dövlət proqramlarının maliyyələşdirilməsində müəyyən dövrilik prinsipi tətbiqinin vacibliyini vurğulayıb. O, bəzi dəstək proqramlarının üç və ya beş ildən bir məcburi səmərəlilik qiymətləndirilməsi aparılmasının məqsədəuyğun olduğunu düşündüyünü deyib. Onun sözlərinə görə, əgər proqram qarşıya qoyulan məqsədə nail olursa, davam etdirilməli, nəticələr zəif olduğu halda isə mexanizmlər dəyişdirilməlidir. Qənaət olunan vəsaitlər, daha aktual ehtiyaclara yönləndirilməlidir. Burada sosial hüquqların və vətəndaş qarşısında dövlətin öhdəliklərinin məhdudlaşdırılması deyil, dövlət vəsaitinin daha səmərəli istifadəsi mövzusu gündəmə gəlir.