Dövlət-özəl tərəfdaşlığı çərçivəsində maliyyə savadlılığı və kibertəhlükəsizlik mövzusunda təlim keçirilib

Ezonn TV «Banker.az» mənbəsinə istinadən xəbər verir. Expressbankın dəstəyi və Kənd Təsərrüfatı Nazirliyi yanında Aqrar Xidmətlər Agentliyinin təşkilatçılığı ilə Cəlilabad Peşə Təhsil Mərkəzində fermerlər və sahibkarlar üçün maliyyə savadlılığı və kibertəhlükəsizlik mövzusunda təlim keçirilib. Bu tədbirin məqsədi, aqrar sektorun inkişafını dəstəkləməkdir. Təlim çərçivəsində bankın ekspertləri, iştirakçılara maliyyə resurslarının idarə olunması, gəlir və xərclərin planlaşdırılması, kredit imkanlarından səmərəli istifadə və maliyyə risklərinin qiymətləndirilməsi barədə praktiki tövsiyələr veriblər. Eyni zamanda, kiberdələduzluqdan qorunma və şəxsi maliyyə məlumatlarının təhlükəsizliyi mövzularında da müzakirələr aparılıb. Aqrar Xidmətlər Agentliyinin Aqrar Təlim Mərkəzinin direktoru Rəşad Mehdizadə, maliyyə savadlılığı və kibertəhlükəsizliyin aqrar sektorun dayanıqlı inkişafında əhəmiyyətini vurğulayıb. O, 2026–2030-cu illər üçün nəzərdə tutulan Dövlət Proqramında aqrar maliyyə və risklərin idarə edilməsi mexanizmlərinin inkişafının prioritet olduğunu qeyd edib. Təlimdə Expressbankın İqtisadi Təhlükəsizlik şöbəsinin müdiri Tofiq Mehdiyev kibertəhlükəsizlik sahəsində iştirakçılara məlumat verib, təhlükəsiz onlayn əməliyyatlar üçün tövsiyələr bölüşüb. Bankın Biznes Bankçılıq departamentinin direktor müavini Yaşar Cabarov isə maliyyə savadlılığının sahibkarlıq fəaliyyətinin davamlılığına müsbət təsir etdiyini vurğulayıb. Bu cür maarifləndirici tədbirlərin keçirilməsi, kənd təsərrüfatı və akvakultura məhsullarının istehsalında keyfiyyətin artırılması, fermerlərin bilik və bacarıqlarının yüksəlməsində mühüm rol oynayır. Expressbank, aqrar sektorda fəaliyyət göstərən sahibkarların yanında olaraq onların biliklərini artırmağa çalışır. Bank, ümumilikdə 18 filial ilə fəaliyyətini davam etdirir.